Þjón­usta

Á starfsárinu var unnið raunfærnimat í 20 greinum. Alls fóru 180 einstaklingar í raunfærnimat á árinu og er það örlítil fækkun frá fyrra ári. Nýtt rafrænt kerfi fyrir raunfærnimat var tekið í notkun haustið 2022. Með nýju kerfi er raunfærnimatsferlið nú orðið rafrænt að öllu leyti og hefur með því skapast hagræðing bæði fyrir þátttakendur í raunfærnimati sem og Iðuna.

Náms- og starfsráðgjafar unnu að gerð fræðsluáætlunar fyrir Umhverfis- og skipulagssvið Reykjavíkurborgar. Var það í annað sinn sem unnin var fræðsluáætlun fyrir Reykjavíkurborg og hefur starfsfólkið þar nýtt sér fjölda námskeiða á vegum Iðunnar. Fyrirhugað er að ráðgjafar Iðunnar vinni að fræðsluáætlun fyrir fleiri fyrirtæki sem hafa aðild að Iðunni.

Metnar einingar á starfsárinu voru 13.005 og tekin voru 1723 viðtöl.

Stjórnir Iðunnar fræðsluseturs og RAFMENNTAR stofnuðu Nemastofa atvinnulífsins þann 18.mars 2022. Markmið Nemastofu atvinnulífsins er að fjölga fagmenntuðu starfsfólki á vinnumarkaði m.a. með því að fjölga fyrirtækjum sem bjóða nemum námssamning, stuðla að fjölgun iðnnema, styðja við og styrkja vinnustaðanám í iðngreinum og stuðla að góðu starfsumhverfi fyrir nema óháð kyni í iðnnámi.

Markmið Nemastofu atvinnulífsins er að stuðla að fjölgun iðnnema, kynna námstækifæri í iðn-og starfsnámi fyrir ungu fólki; styðja iðnnema sem eru ekki með íslensku að móðurmáli í iðnnámi;  vinna gegn brottfalli í iðn- og starfsnámi; stuðla að jafnari kynjahlutfall í iðngreinum; taka þátt í verkefnum sem miða að því að bæta ímynd vinnustaðanáms; efla vitund innan fyrirtækja um mikilvægi jákvæðarar vinnustaðamenningar ofl. Áherslur og verkefni Nemastofu atvinnulífsins eru í takt við heimsmarkmið um sjálfbæra þróun. Ársuppgjör Nemastofu atvinnulífsins má lesa á www.nemastofa.is.

Iðan veitir nemendum í verknámi fjölbreytta þjónustu. Iðan veitir sveinsprófsnefndum 28 löggiltra iðngreina þjónustu með skráningu nemenda í sveinspróf, undirbúning prófa og aðstoð við gerð verklagsgreina um framkvæmd prófa.  Á tímabilinu 1.júlí 2022- 30.júní 2023 stóðust samtals 786 sveinspróf í þeim iðngreinum sem Iðan þjónar.

Iðan fræðslusetur leitast við að veita jöfn tækifæri til náms og býður upp á sérúrræði í sveinsprófum fyrir þá einstaklinga sem búa við fötlun eða aðra hömlun sem hindrar þá í námi. Sérúrræðin geta falist í lengri próftíma, stærra letri á prófblöðum, munnlegum prófum, upplestri á prófum eða túlkaþjónustu.