Fræðsla

Áfram hefur verið mikil ásókn í rafbílanámskeið sem vottuð eru af Institute of Motor Industry (IMI) í Bretlandi og því hefur þungamiðja námskeiðshalds á bílgreinasviði verið þar. Umboð jafnt og almenn verkstæði hafa verið dugleg að senda sitt fólk og er almennt mikil ánægja hjá þátttakendum.

Vistvænar byggingar og sjálfbærni hafa verið ofarlega á baugi í byggingariðnaðum að undanförnu og hefur Iðan hefur boðið upp á námskeið um málefnið. Þau hafa verið vel sótt og greinilega vaxandi áhugi meðal iðnaðarmanna. Má þar nefna námskeið um svansvottuð hús, vistvæn byggingarefni, meðhöndlun byggingarúrgangs og lífsferilsgreiningar. 

Nýr leiðtogi matvæla- og veitingagreina var ráðinn á starfsárinu, Steinn Óskar Sigurðsson matreiðslumeistari. Fræðslustarfið einkenndist fjölbreyttri miðlun á sérfræðiþekkingu innlends og erlends fagfólks í hlaðvörpum og fræðslumolum til félagsfólks. Námskeið voru ýmist haldin á íslensku og ensku enda fjölgar fagfólki í matvæla og veitingagreinum sem er af erlendu bergi brotið. 

Í málm- og véltæknigreinum leiðir nú Óskar Grétarsson þróun og framleiðslu námskeiða og tók við af Kristjáni Kristjánssyni sem lét af störfum vegna aldurs. Fræðslustarfið var með nokkuð hefðbundnu sniði en gert var sérstakt átak í heimsóknum til fyrirtækja til að kanna fræðsluþarfir félagsfólks. 

Helstu áherslur á liðnu starfsári voru miðlun á sérfræðikunnáttu okkar fremsta fagfólks. Birna Geirfinnsdóttir prófessor miðlaði kenningum Jost Hochult í leturfræði í byrjun febrúar fyrir fullu húsi. Á fyrirlesturinn mætti fagfólk í prentiðnaði jafnt og hönnuðir. Steinar Júlíusson bauð upp á þjálfun í hreyfihönnun og þrívídd fyrir grafíska miðlara.

Markmið Iðunnar er að fræðslustarfið einkennist af frjóu nýsköpunar- og tækniumhverfi og sjálfbærni.
Iðan býður félagsmönnum upp á nám sem stuðlar að og eflir nýsköpun og sjálfbærni.